Prezidentin sözçüsü: Türkiyə İsveç və Finlandiyanın PKK/PYD/YPG terror qruplarına bağlı strukturlara qarşı açıq mövqe nümayiş etdirməsini gözləyir.
Mehmet Tosun |
27.06.2022
Ankara
Türkiyə prezidentinin sözçüsü bazar günü bildirib ki, Türkiyə, NATO, İsveç və Finlandiya bu həftə Madriddə mühüm NATO sammiti çərçivəsində dördlü liderlər sammiti keçirəcək.
“Çərşənbə axşamı NATO-nun baş katibi Yens Stoltenberqin tələbi ilə Madriddə Türkiyə prezidenti Rəcəb Tayyib Ərdoğanın iştirakı ilə dördtərəfli sammit keçiriləcək. Bu sammitdə iştirakımız mövqeyimizdən geri çəkiləcəyimiz anlamına gəlmir”, – İbrahim Kalın Türkiyənin “Habertürk” telekanalına açıqlamasında deyib.
Kalın xatırladıb ki, Türkiyə rəsmiləri indiyədək İsveç və Finlandiyalı həmkarları ilə iki ölkənin NATO-ya üzvlük müraciətlərini müzakirə etmək üçün iki görüş keçiriblər.
Kalın, Ərdoğan və Stoltenberq arasında telefon danışığı zamanı alınan qərar çərçivəsində Türkiyə xarici işlər nazirinin müavini Sedat Önalla danışıqların üçüncü raundu üçün bazar ertəsi Brüsselə rəsmi səfər edəcəklərini bildirib.
Kalın əlavə edib ki, danışıqların dördüncü raundu da Madrid sammiti öncəsi keçiriləcək.
Kalın, Türkiyənin İsveç və Finlandiyanın PKK/PYD/YPG terror qrupları və onlara bağlı strukturlara qarşı açıq və birmənalı mövqe tutmasını gözlədiyini bir daha vurğulayıb.
Bu həftə İspaniyanın paytaxtında hərbi ittifaq üstünlük təşkil edəcək, çünki NATO liderləri Soyuq Müharibədən sonra onun ən böyük hərbi yerləşdirilməsinin nə ola biləcəyini müzakirə etmək üçün Madriddə görüşəcəklər.
NATO sammiti çərşənbə axşamından cümə axşamına kimi davam edəcək, danışıqların əsas mərkəzində NATO-nun Ukraynadakı müharibəyə reaksiyası, Finlandiya və İsveçin alyansa qoşulmaq üçün müraciətləri müzakirə olunacaq.
Builki sammit daha da tarixi əhəmiyyət qazanacaq, çünki alyans NATO-nun növbəti onillik üçün məqsəd və planlarını əks etdirən yeni strateji konsepsiyasını qəbul edəcək.
İsveç Finlandiya ilə birlikdə keçən ay NATO-ya üzv olmaq üçün rəsmi müraciət etmişdi, bu qərar Rusiyanın Ukraynaya qarşı fevralın 24-də başlayan müharibəsindən irəli gəlirdi.
Lakin alyansın uzun müddətdir üzvü olan Türkiyə üzvlük təkliflərinə etirazlarını bildirib, ölkələri terrorçu qruplara dözmək və hətta onları dəstəkləməkdə tənqid edib.
Türkiyəyə qarşı 35 ildən çox davam edən terror kampaniyasında Türkiyə, ABŞ və Avropa İttifaqı tərəfindən terror təşkilatları siyahısına salınan PKK 40 mindən çox insanın ölümünə səbəb olub.
*Müəllifi Zehra Nur Düz
