Birləşmiş Millətlər Təşkilatı cümə günü Ukrayna prezidenti Vladimir Zelenskinin gələn həftə Baş Assambleyanın iclası zamanı video bağlantı vasitəsilə danışmasına icazə verilməsinə səs verib.
BMT-yə üzv olan 193 ölkədən 101-i Zelenskinin adətən tələb olunduğu kimi şəxsən danışmaq əvəzinə, “əvvəlcədən yazılan çıxışı təqdim etməsinə” səs verib.
Rusiya da daxil olmaqla 7 ölkə təklifin əleyhinə səs verib.
Korona pandemiyası səbəbindən dünya liderlərinə 2020 və 2021-ci illərdə video bağlantı vasitəsilə danışmağa icazə verildi, lakin bu il tədbir Nyu-Yorkda yerində keçirilməyə başladı və yalnız iştirak edənlər danışa bilər.
Gələn həftənin çərşənbə axşamı günündən etibarən üzv dövlətlərin 150-yə yaxın nümayəndəsi BMT Baş Assambleyası qarşısında çıxış edəcək.
Meksika prezidenti Andrés Manuel Lopez Obrador bildirib ki, ölkə gələn həftə Baş Assambleyada Ukrayna ilə bağlı sülh planını təqdim edəcək. Onun sözlərinə görə, Roma Papası Fransisk, BMT-nin baş katibi Antonio Quterreş və Hindistanın baş naziri Narendra Modi dialoq və sülh komitəsinin yaradılmasında iştirak edir.
– Söhbət Ukraynada müharibəni mümkün qədər tez dayandırmaq üçün razılaşma əldə etməkdən gedir, Lopez Obrador deyir və davam edir:
– Sülhməramlı missiya dərhal Ukraynadakı döyüşlərə son qoymalı və Ukrayna prezidenti Zelenski və Rusiya prezidenti Putinlə birbaşa danışıqlara başlamalıdır.
Hazırda ölkəsi BMT Təhlükəsizlik Şurasının qeyri-daimi üzvü olan López Obrador BMT-ni münaqişədə “fəal olmamaq” üçün tənqid edir.
