Türkiyə Rusiyanın Ukraynanın separatçı bölgələrini tanımaq qərarını “rədd edir”

Ankara Ukraynanın siyasi birliyinin və ərazi bütövlüyünün qorunmasına sadiqliyini vurğulayır, bütün tərəfləri sağlam düşüncə ilə hərəkət etməyə çağırır
Handan Kazancı 22.02.2022

İSTANBUL

Türkiyə çərşənbə axşamı Rusiyanın Ukraynanın separatçı bölgələri olan Donetsk və Luqanskı tanımaq qərarını rədd edərək, bunu “qəbuledilməz” adlandırıb.

“Rusiya Federasiyasının qondarma Donetsk və Luqansk respublikalarını tanımaq qərarı Minsk razılaşmalarına zidd olmaqla yanaşı, Ukraynanın siyasi birliyinin və ərazi bütövlüyünün açıq şəkildə pozulmasını təşkil edir”, – Türkiyə Xarici İşlər Nazirliyinin bəyanatında deyilir.

“Rusiya Federasiyasının qərarı qəbuledilməzdir və biz onu rədd edirik”, – deyə əlavə edib.

“Biz bir daha Ukraynanın siyasi birliyinin və ərazi bütövlüyünün qorunub saxlanmasına sadiqliyimizi təkrarlayırıq və bütün əlaqədar tərəfləri sağlam düşüncə ilə hərəkət etməyə və beynəlxalq hüquqa riayət etməyə dəvət edirik”, – bəyanatda deyilir.

Bu addım Rusiya prezidenti Vladimir Putinin bazar ertəsi Ukraynanın Donetsk və Luqansk vilayətlərini rəsmən müstəqil dövlətlər kimi tanımasından və onların separatçı liderləri ilə Kremldə saziş imzalamasından sonra atılıb.

Son vaxtlar Ukraynanın şərqində gərginlik kəskin şəkildə artıb, atəşkəs rejiminin pozulması, çoxsaylı atəş insidentləri və rusiyayönlü separatçı Donetsk və Luqansk bölgələrindən dinc əhalinin təxliyəsi barədə xəbərlər yayılıb.

Qərb ölkələri Rusiyanı Ukrayna yaxınlığında 100 mindən çox hərbçi toplamaqda ittiham edərək, onun keçmiş sovet qonşusuna qarşı hərbi hücum planlaşdıra biləcəyindən ehtiyatlanır.

Moskva dəfələrlə Ukraynanı işğal etmək planını rədd edib və bunun əvəzində Qərb ölkələrini NATO-nun sərhədlərinə doğru genişlənməsi vasitəsilə Rusiyanın təhlükəsizliyini pozmaqda ittiham edib.