Türkiyə prezidenti və Səudiyyə Ərəbistanının vəliəhd şahzadəsi ikitərəfli əlaqələrdə əməkdaşlığın yeni dövrünü müzakirə ediblər

Ankara və Ər-Riyad sabitliyi və sülhü möhkəmləndirmək üçün regional məsələlər üzrə məsləhətləşmələri və əməkdaşlığı dərinləşdirməyə qərar verdilər, birgə bəyannamədə deyilir
Gözde Bayar, Handan Kazancı |
22.06.2022
ANKARA/İSTANBUL

Türkiyə prezidenti və Səudiyyə Ərəbistanının vəliəhd şahzadəsi çərşənbə günü ikitərəfli əlaqələr, o cümlədən siyasi, iqtisadi, hərbi, təhlükəsizlik və mədəni əlaqələrdə əməkdaşlığın yeni dövrünü müzakirə ediblər.

Türkiyə prezidenti Rəcəb Tayyib Ərdoğan Səudiyyə Ərəbistanının vəliəhd şahzadəsi Məhəmməd bin Salmanı paytaxt Ankarada rəsmi mərasimlə qarşılayıb.

Birgə bəyannaməyə əsasən, liderlər ölkələrin bir çox sahələrdə hərtərəfli əməkdaşlığın yeni erasına başlamaq əzmində olduqlarını vurğulayıblar.

Ankara və Ər-Riyad sabitliyi və sülhü möhkəmləndirmək üçün regional məsələlər üzrə məsləhətləşmələri və əməkdaşlığı dərinləşdirməyə qərar verdilər.

İki lider regionun gələcəyi naminə iki xalqın “tarixi qardaşlığı” əsasında əməkdaşlığı inkişaf etdirməyə və davam etdirməyə söz veriblər.

Həmçinin uçuşların sayının artırılması, ikitərəfli ticarətin asanlaşdırılması, investisiya imkanlarının araşdırılması və konkret tərəfdaşlığa çevrilməsinin vacibliyi vurğulanıb.

Səudiyyə Ərəbistanı Türkiyə-Səudiyyə Ərəbistanı birgə bəyannaməsinə əsasən, Ər-Riyadın EXPO 2030-a ev sahibliyi etmək namizədliyinə verdiyi dəstəyə görə təşəkkürünü bildirib.

Aprelin sonunda Ərdoğan Səudiyyə Ərəbistanına ikigünlük işgüzar səfər edib və bu, ikitərəfli əlaqələri gücləndirmək məqsədi daşıyıb.

Səfər zamanı Ərdoğan Səudiyyə Ərəbistanı kralı Salman bin Əbdüləziz Əl Səud, o cümlədən vəliəhd şahzadə ilə görüşüb, müxtəlif beynəlxalq, regional və ikitərəfli məsələləri müzakirə edib.

Ərdoğan Səudiyyə Ərəbistanına səfərindən sonra Türkiyəyə qayıdarkən Ankara və Ər-Riyadın regionun ümumi maraqları və sabitliyi üçün səylərini davam etdirməkdə qərarlı olduqlarını bildirib.

Münasibətlərin normallaşdırılması üçün Misir, İsrail və Birləşmiş Ərəb Əmirlikləri ilə danışıqlar apararkən Ərdoğan bu səyləri düşmən deyil, dostluq prosesi üçün “yeni dövr” kimi qiymətləndirib.