Ukrayna ordusu iddia edir ki, onlar son 24 saat ərzində şərqdə Rusiyanın müdafiə xəttini keçərək, əvvəllər Rusiyanın nəzarətində olan ərazilərə təxminən 50 kilometr irəliləyiblər. Cümə günü Reuters xəbər verir ki, sıçrayış Xarkovun cənubundakı ön hissədə baş verib.
ISW analitik mərkəzinin məlumatına görə, Ukrayna qüvvələri hazırda Rusiya işğalçı qüvvələrinin silah, sursat və digər təchizatların cəbhəyə daşınması üçün mühüm dəmir yolu qovşağı olan Kupyanskdan təxminən 15 kilometr aralıdadır. Məlumata görə, şəhər bir neçə gün ərzində geri alına bilər.
Moskva hadisələrin inkişafı ilə bağlı hələlik şərh verməyib, Ukrayna isə müstəqil jurnalistlərin əks-hücumun davam etdiyi ərazilərə yaxın olmasına icazə vermir.
Bununla belə, sosial şəbəkələrdə yayılan təsdiqlənməmiş videolarda göyərtəsində şən əsgərlərin olduğu Ukrayna zirehli maşınlarının əvvəllər Rusiyanın nəzarətində olan yerlərin adları yazılmış yol nişanlarının yanından necə keçdiyi göstərilir.
“Biz Xersonda uğur, Xarkovda isə müəyyən uğur görə bilərik və bu, çox, çox ümidvericidir”, – ABŞ Müdafiə naziri Lloyd Austin Praqada çıxışı zamanı deyib.
