Rusiyanın xarici işlər naziri Sergey Lavrov deyir ki, ABŞ və NATO ölkəni silahla təmin etdikcə Ukrayna müharibəsinin diplomatik yolla həlli mümkün deyil. O, həmçinin çoxlu sayda insanın Rusiyaya təxliyə olunmaq üçün müraciət etdiyini və artıq bir milyondan çox insanın qəbul edildiyini iddia edir.
Sergey Lavrov deyir ki, əgər ABŞ və NATO Rusiyada müharibə kimi deyil, “xüsusi əməliyyat” kimi qələmə verilən Ukraynadakı vəziyyətin həllini həqiqətən istəyirlərsə, ora silah göndərməyi dayandırmalıdırlar.
“NATO ölkələri Kiyev rejiminə dəstəyini açıq şəkildə ifadə etməklə, əməliyyatın siyasi razılaşmalarla bitməməsi üçün əllərindən gələni edirlər”, – Lavrov bildirib.
Lavrov, Reuters-in məlumatına görə, Rusiya işğalının başladığı 24 fevraldan bəri Ukraynadan Rusiyaya bir milyondan çox insanın təxliyə edildiyini iddia edir. Məlumat şənbə günü səhər saatlarında dərc edilən bəyanatda yer alıb.
Onların arasında Ukrayna vətəndaşı olmayan təxminən 120 min nəfərin, həmçinin Dontesk və Luqanskda Rusiyanın dəstəklədiyi separatçı bölgələrdən olanların olduğu bildirilir.
BMT-nin məlumatına görə, müharibə başlayandan bəri 11 milyondan çox ukraynalı evlərini tərk etmək məcburiyyətində qalıb və onların demək olar ki, yarısı başqa ölkələrə qaçıb.
Lavrov iddia edir ki, 2,8 milyon insan Rusiyaya təxliyə olunmaq üçün müraciət edib, Ukrayna isə Moskvanın minlərlə insanı zorla oraya apardığını düşünür.
İnsanları ölkənin ən pis müharibədən zərər çəkmiş bölgələrindən, məsələn Mariupol limanından çıxarmaq cəhdləri dəfələrlə edilən cəhdlərə baxmayaraq uğursuzluğa düçar olub və hər iki tərəf uğursuzluqlarda bir-birini günahlandırır. (TT)
